بصه يا جماعة ، ها بصيته ؟ لأ صحيح بصه انا جالي دلوقتي الهام مركب من حاجتين عيالي جدا و في منتهي البراءة ، الحاجة الاولانية مصدر سعادة و هو موضوع جميل لصديقتي مروة جمعة علي المدونة بتاعتها (صباح الورد) عن الالعاب اللي كانت بتلعبها و هي صغيرة و الحاجة التانية مصدر نكد و هو مادة الاطفال العزيزة اللي انا غارقانة في اشعاتها و سي تي هاتها و تحاليلها عشان حمتحن فيها اكلنيكي المهم، ما تيجو كل واحد فينا يكتب كان بيلعب ايه و هو صغير ، يعني و حضرتك او حضرتِك عيال كنتو بتلعبوا ايه ، طبعا انا بتكلم هنا عن الابتكار ، يعني الالعاب اللي من تأليفنا ، انا شخصيا كنت بالعب تلت لعبات ابوخ من بعض ، الاولانية مكانتش لعبة ، كانت طريقة مذاكرة ابتكرتها و انا صغيرة ، كنت بارص الدباديب فوق السرير و اعمل عليهم مدرسة و اذاكر و اسمعلهم دبدوبة دبدوبة و الدبدوبة اللي كانت تنسي (ده طبعا معناه ان انا اللي نسيت المرادي) كنت ادور وشها للحيط اما اللعبة التانية و دي كانت لعبتي المفضلة ، كنت بحط ترابيزة المكوي جوة الأوضة بتاعتي و اعمل اخويا تمرجي يدخلي العيانين (اللي هما الدباديب المسكينة اياها ) عيان عيان (قصدي دبدوب دبدوب) و لما كنت من صغري مجنونة جراحة زي ما زمايلي في الكلية شايفين ، كاان كل دبدوب اقول انه محتاج عملية و فورا و اجيب ادواتي و اتعقم و اعقم اخويا (اللي دلوقتي بيلعب دور النايب) و افتح و اشيل شوية قطن بعدين اقفل الدبدوبة بغرز تجميلية تحت الوبر عشان ماما ما تشوفهاش و تطين عيشتيو يمكن ده اللي خلاني عايزة اتخصص جراحة تجميل (ابقوا فكروني احكي الحكاية دي لما اخذ جايز نوبل :) لحد ما جت في يوم و الدبدوبة المريضة كانت بابا جايبهالي من كوريا و الله يخرب بيتهم الجماعة الكوريين بيعملوا الدباديب من غير وبر كتير عشان الحساسية يظهر، فبان (الجرح) في الدبدوبة و عينكم ما تشوف إلا النور ، اما بقي اللعبة الاخيرة فكانت من تأليف اخويا اكتر مني و هي اننا نعمل سريري لانش بينتشل الضحايا الغرقانين (اللي هما برضه الدباديب) من البحر اللي هو سجادة اوضتي ، نربط واحد فينا بحبل و ينزل من السرير يجيب الضحايا و التاني ماسك الحبل فوق السرير بيشده ليغرق في اعماق السجادة و بعدها نسعف الدباديب الغريقة ،و الغريب اللي اكتشفتوا دلوقتي بس ان اخويا الخبيث كان دايما يخلينا نلعب في اوضتي انا عشان تفضل اوضته نضيفة و يبقي هو الابن المنظم، عن اذنكم انا رايحة اكركبله اوضته بأثر راجعي، انا عايزة كل واحد يقرا يكتب يقول لنا هو كان بيلعب ايه و ارجوكم اكتبوا حاجات مصايب زي كدة عشان محسش اني المجنونة الوحيدة ، في انتظار مشاركاتكم
