تقابل قد ما تقابل و تعرف قد ما تعرف ملكش غير نفسك لذلك لا تنساها

ضربة قدم في رحم رجت الدنيا من حواليك، و ده كان أول إعلان بتعلن بيه نفسك عن وجودها ، أول ما عرفت بوجودك التفت، اكتشفت إنك لوحدك، ملاكش غيرها ( نفسك يعني) حبيتها أوي و عشت ليها و عشانها، أكلت و اتنفست و ائتنست بيها، لحد ما جت اللحظة اللي وجدت فيها انك محاط بناس كتيرة أوي شبه نفسك، بتوعدك و تكلمك و تدلعك و تديك لبن، هدايا ، لعب، أصبح عندك variety كبيرة من البشر تختار منهم ، ناس حبيتهم أوي و ناس كرهتهم أوي، حبيت تانت اللي كل ما تشوفك تديك شيكولاتة و كرهت ابنها الغلس اللي كل مرة يخطفها منك ، حبيت امك و عيلتك و في وسط كل دول نسيت نفسك اللي صحيح دايما معاك بس لا عمرها كلمتك ولا اديتك ولا وعدتك ، فضلت تتفرج عليهم و عليك و اختارت تكون في الظل مادام اتشغلت بغيرها عنها ، فضلت تصبر،و مر وقت أكتر، و بدأت الناس تتغير، حتي امك حرمتك لبنها و بدأت تنشغل عنك ، قالتلك انت دلوقتي تقدر تعتمد علي نفسك و هي متعرفش انها بسببهم اصبحت غريبة عنك و اكتشفت إن الناس زي ما اعتطك حرمتك ، زي ما وعدتك جرحتك و انفضوا من حواليك واحد ورا التاني و الغريب أنك بدل ما تكرههم كرهت نفسك، قعدت مستني حد غيرهم يدخل حياتك، يعوض اللي اتحرمت منهم غصب عنك و عنهم أو اللي خانوك و باعوك،بس اكتشفت انك لوحدك، التفت لقيتها جنبك _ نفسك_ لمتها علي اللي حصل لك و بعد كدة حنيت لها من جديد و بدأت تصعب عليك وقبل ما ترجع علاقتك بيها زي الأول ، دخلت المدرسة و وجدت ناس جديدة من حواليك و دايرة الاختيار وسعت أكتر و أكتر ، ناس حسسوك انهم احسن من اللي قبلهم و ناس عرفوك قيمة اللي قبلهم و رجع الناس من حواليك، ناس توعدك و ناس تعطيك و الجديد، ناس تمثل عليك ، اكتشفت انهم زي ما منحوك حرموك و زي ما وعدوك جرحوك ، خدعوك ، حاولت تستني ناس جديدة تغير حياتك و تعوضك , و لما اتأخروا رجعت من تاني لنفسك تلومها بعدين تحنلها وقبل ما ترجع علاقتك بيها زي الأول، ،دخلت الجامعة وبدأت تدور علي حب يكون جنبك ، كونت صداقات و أعداء نجحوا في انهم ينسوك نفسك حبيت و اعترفت لحبيبتك انك حبيتها اكتر من نفسك ، و هي سامعاك ( دي اللي هي نفسك) و بتقول في سرها و ايه الجديد في كدة ، حبيبتك صدمتك و اصحابك باعوك ووجدت نفسك من تاني لوحدك ،التفت من حواليك ملقيتش غير نفسك في الأول لمتها بعدين حنيت و صعبت عليك و قبل ما ترجع علاقتك بيها زي الأول اتخرجت و اشتغلت و كونت اسرة ، شغلك عنها مديرك اللي بيضرب فيك زنب و ابنك اللي عاوز جزمة جديدة، وجدت ناس كتير من حواليك، ناس منحتك و ناس و عدتك و الجديد ناس محتاجاك و مر الوقت و اللي اعطاك حرمك و اللي كان محتاج لك اتخلي عنك، ناس القدر حرمك منهم و ناس حرموك هما منهم ، حاولت ترجعهم أو تلاقي غيرهم بس المدة طولت و حسيت انك لوحدك و التفت لقيتها جنبك ( دي اللي هي نفسك ) بس كان في حاجة فيها اتغيرت يمكن ثورة و يمكن انكسار بس انت برضه لمتها في الأول و بعدين حنيت و صعبت عليك و قبل ما ترجع تاني تنساها ضربة قدم اخيرة رجت الدنيا من حواليك، تعلن بيها نفسك تمردها عليك و تسيبك للي ياما سيبتها و نسيتها عشانهم ، تسيبك عشان تكتشف إن هم كمان سابوك و نسيوك بعد ما دمعوا عليك دمعتين و تعرف إنك لأول مرة بجد لوحدك